Okkar framtíð

Stækkaðu framtíðina hvetur alla grunnskóla landsins að taka þátt í könnuninni „Okkar framtíð“. Með henni verður Ísland fyrsta landið til að safna svörum frá nemendum í 1.–10. bekk um hvernig þau sjá framtíðina, vonir þeirra og væntingar til starfsframa og menntunar, ásamt áhrifum skóla, fjölskyldu, staðsetningar og samfélagsmiðla á framtíðarsýnina.

Teiknaðu framtíðina og Þín rödd

Tvær aðferðir verða notaðar til að aðlaga könnunina að mismunandi aldurshópum, báðar byggðar á alþjóðlegum ramma þróuðum af rannsóknardeild Education and Employers í Bretlandi:

Teiknaðu framtíðina (1.–7. bekkur): Börnin teikna myndir af því sem þau vilja verða og svara stuttum spurningum um væntingar sínar og áhrifavalda.

Þín rödd (8.–10. bekkur): Ungmennin svara rafrænni könnun og skrifa um mikilvæg málefni. Sum þeirra munu einnig búa til myndbönd tengd þeim málefnum.

Hvers vegna?

Markmið

Kortleggja starfsvæntingar barna og ungmenna á Íslandi.
Greina áhrif samfélagsmiðla og annarra þátta á vonir og væntingar.
Skilja lykilmálefni sem skipta unga fólkið máli.
Meta mismun eftir staðsetningu og bakgrunni.
Skoða hvaða námsgreinar vekja áhuga og tengjast framtíðaráformum.
Hjálpa ungu fólki að sjá þau tækifæri sem eru til staðar.
Greina samræmi væntinga unga fólksins við efnahagslegar þarfir Íslands.

Áhrif og ávinningur

Niðurstöðurnar munu veita innsýn í framtíðarsýn unga fólksins, gagnast við stefnumótun í menntamálum og styðja vinnumarkaðinn í að mæta starfsvæntingum þeirra. Niðurstöður bera saman væntingar við framtíðaratvinnuþróun og skoða málefni eins og heilsu, fjölskyldu, jafnrétti og samfélagslegar áskoranir.

Opinber kynning

Niðurstöður verða kynntar opinberlega ásamt sýningu á teikningum, textum og myndböndum nemenda.